لا للاستحمار
الجحش قال للحمار *** يابا اديني الحنطور
يابا انت سنك كبر*** و وجب عليا الدور
كح الحمار كحة *** فزعت لها الركاب
مش يابني بالصحة *** ده كل شئ بحساب
وسواقة الحنطور *** محتاجة حد حكيم
وانت عينيك فارغة *** همك علي البرسيم
قوللي تسوق ازاي *** والتبن مالي عينيك
ده حتي حبل اللجام *** واسع يا ابني عليك
اعقل وبطل طمع *** لاتسخن الركاب
ما تجيش يا واد جنبهم *** لاتبقي ليلة هباب
دول صنف ناس جبار *** قادر مالوهش امان
يبان عليهم وهن *** لكنهم فرسان
يابا دا نومهم تقل *** وبقاله يابا سنين
كل البشر صحصحوا *** ولسه دول نايمين
يا جحش بطل هبل *** وبلاش تعيش مغرور
ركابنا مش اغبيا *** ولا عضمهم مكسور
بكرة حيصحولك *** ويزلزلوا الحنطور
وتلاقي في قفاك *** تمانين خازوق محشور
•
•
أحمد فؤاد نجم
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.