**القبض على دينا عزت.. عصابة أم دولة؟!**
- نشرت مواطنة مصرية اسمها دينا عزت مقاطع فيديو بترصد فيها عملية اعتقال قوة من قسم مدينة نصر لزوجها، واتهمت بتلفيق القضية بعد سلسلة ابتزاز من أمين شرطة اسمه عبد العزيز وضابط اسمه أحمد مختار، قبل القبض عليها ونشر الداخلية بيان تكذيب بلا تحقيق.
- دينا قالت في مقطع فيديو نشرته على صفحتها الشخصية، أنه زوجها شخص بسيط عنده فرشة في شارع عباس العقاد بيسترزق منها من بعد العصر لحد 12 بالليل بجانب عمله على عربيته الشخصية أوبر من الصبح لحد العصر، ووفقا لكلامها رفض زوجها التعاون مع أمين شرطة اللي بيحصل منه إتاوة لتركه يقف في الشارع كل كم يوم.
- دينا قالت أنهم كانوا راضيين بحالهم طول ما الدنيا ماشية، لحد ما اصطدم جوزها بأمين الشرطة ورفض يشتغل معاه مرشد للبوليس.
- أمين الشرطة اللي غالبا أزعجه رفض مواطن بسيط أنه يشتغل معاه اللي هو المفترض حقه يعني في أدبيات العالم أجمع إلا سيادة الأمين ورؤسائه، وفضل مترصد للشاب دا لحد ما لقاه باع عربيته وغالبا تمن العربية لمع في عينه أكتر من الإتاوة الأسبوعية!
- وفقا لدينا، كانوا مخططين أنهم يبيعوا العربية وهي تبيع دهبها علشان يدفعوا مقدم شقة تمليك بدل الإيجار، لكن أمين الشرطة طلب منه فلوس العربية مش الإتاوة المعتادة، ولما رفض عمله محضر مخدرات وأخدوا من بيتها 330 ألف جنيه حرزوا منها 66 ألف جنيه.
- دينا قالت أنها مضطرة تنشر الفيديو دا وفيديوهات القبض عليه من بيتهم بعد 54 يوما من القبض عليه والقبض على حماتها قبل تركها، ومن محاولاتها اللجوء لتفتيش الضباط إلخ ومحدش أنقذ جوزها ولا رجعله حقه من أمين الشرطة.
- بينما محضر القضية بيقول أنه اتقبض عليه وهو بيروج مخدرات بموتوسيكل في الحديقة الدولية، علشان تصور الحديقة وكيفية الدخول والزحام الموجود فيها وعدم إمكانية الدخول بأي موتوسيكل وطالبت بتفريغ كاميرات الحديقة الدولية، دا طبعا غير شهادتها عن تعرضه للتعذيب بالصعق بالكهرباء، وأكدت إقرار مأمور القسم بما حدث وتأكيده نقله لسجن النهضة.
- دينا قالت إنها كل ما تريده محاسبة الجاني وفقط، لكن الداخلية قبضت عليها كالعادة.
- أحد الفيديوهات اللي بتظهر عملية القبض على زوج دينا، بيسأله أحد أفراد المباحث، مال العز دا كله منين، اللي هو عفش متوسط في شقة إيجار متوسطة الحال في أحد الأحياء الشعبية الملاصقة لمدينة نصر وإيجارها تقريبا بنفس قيمة الإتاوة اللي بتتهم الأمين أنه بياخدها منها!
**
رواية الداخلية
- لاحقا مساء الاثنين، نشرت الصفحة الرسمية للوزارة تكذيب للواقعة بلا تحقيق أو غيره ولا حتي تكليف نفسها تبعت لأمين الشرطة تسأله، وقالت أنه الواقعة حصلت بتاريخ 26 يوليو الماضي قامت قوة من قسم أول مدينة نصر بضبط الزوج البائع المتجول بالقبض على الزوج المقيم في دائرة قسم ثالث مدينة نصر.
- ببساطة شارع عباس العقاد تابع لدائرة قسم أول، والمواطن ساكن في دائرة قسم ثالث، فما هو الرابط العجيب؟ إنه أمين الشرطة بيشتغل في قسم أول؟ ولو فيه تحريات فعلا عن المواطن ومحل سكنه وحيازته للمخدرات المدعاة وتعاطيه لها أو حتى حد بلغ عنه لما شم ريحة تدخين الحشيش من جوة بيته واللي بيتعاطاها في بيته زي ما البيان قال، فهل هي تحريات قسم أول ولا قسم تالت؟
- النقطة التانية أنه الداخلية بتقول أنه تم ضبط مواد مخدرة من الحشيش ومبالغ مالية وسلاح أبيض، السلاح الأبيض الظاهر في صورة الداخلية هو سكين مطبخ عادي! وإيه علاقة سكينة المطبخ بتعاطي الحشيش؟ وليه الفجر؟
- طيب هو اتقبض عليه متلبس بالتعاطي، إزاي هيتطوع ويرشد بنفسه عن كمية من مخدرات الآيس والحشيش والمبالغ المالية؟ هيلبس نفسه إتجار يعني ولا إيه؟ ولا البيان بيدور علي مبرر للاستيلاء على الفلوس؟ وبعدين الست بتقول أخدوا دهب، فين الدهب من الأحراز اللي رصوها كالعادة قدامه؟
- وإيه علاقة المبلغ بتعاطيه؟ هل الداخلية اعتبرتها المادة الأصلية المعادلة للحشيش اللي بيشتريه مثلا علشان كدا حرزتها؟ وكذلك إيه علاقة التلات تليفونات؟ يعني بيت فيه زوج وزوجة مش طبيعي يكون فيها اتنين تليفون بجانب عدة قديمة بايظة مثلا محدش بقى بيستخدمها؟ واللفة اللي لونها ذهبي اللي بتوحي بأنها سبيكة دهب؟
- الغريب أنه بدون أي تحقيق أو محاولة نزيهة أو حتى منطقية لسبك الرواية، نشر البيان وبالتوازي اعتقلت السيدة وفي طريقها للعرض على النيابة بالتهم المعتادة "نشر أخبار كاذبة" أو "الاتهامات"، فهل السادة في النيابة العامة عندهم استعداد يحققوا في الواقعة بكل شفافية ونزاهة؟ ولا هيتبنوا رواية الداخلية ويساهموا في ظلم السيدة زي ما ادعائها بتعرض زوجها للظلم؟
- وأخيرا بنسأل السادة القائمين على صفحة الداخلية، فين محضر القضية؟ يمكن يعني يكون اللي بتقوله مش صحيح!
***
هي دي مصر؟
- ممارسات بترجع بينا للعهد المباركي وخصوصا سنوات ما قبل الثورة، حيث كل أمين شرطة/ مخبر بيعامل المنطقة اللي بيشتغل فيها وكأنها تكية ورثها لكن المرة دي مش عن عائلته ولكن الميري اللي بيشتغل فيه.
- إزاي نعتبر نفسنا بنعيش في دولة محترمة بيحصل فيها الظلم البين دا وشبهات البلطجة؟ أصل هنسمي إيه أمين شرطة زغللت في عينها 66 ألف جنيه وشوية دهب واستكترهم على مواطن شقيان على فرشة وعربية وساكن في مساكن تحت متوسطة، لا إزاي لازم تفضل مدفون في العشوائيات مثلا؟
- وإزاي هنتعامل مع الداخلية على أنها قوة "إنفاذ قانون" وهي أفرادها بيزغلل في عينهم الفلوس ولما فرد وحيدا ميعرفش ياخدها يبلغ ضابط المباحث علشان ياخدوها ميري/ منطق عصابات؟
- بنقول دا واحنا بنشوف وبنرصد عشرات الشكاوى السوشيال ميديا من ممارسات الداخلية، من المواطن محمد أسامة اللي قتله أمين شرطة في المنوفية بعد 10 سنوات من المضايقات، إلى اعتداء ضابط على سايس نادي القضاة إلى ضابط قنا اللي حاول يعمل نفس لقطات البلطجة فاتضرب في قنا، إلى قتل المواطنين في الأقسام ودهسهم في الشارع والإفلات من العقاب وأحيانا حتى المحاكمة زي ما شفنا في وقائع فرحات المحفوظي ويوسف السرحاني وفرج رياض في مطروح إلى مدينتي إلى إلى..!
- ما زلنا نكرر ونحذر، فلتضبطوا أداء أفراد الداخلية أو تنتظروا انفلات كنتيجة حتمية لمواجهة يريدها "السادة" مفتوحة في استباحة "العبيد".
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.