- خلال اليومين اللي فاتوا، تابعنا كارثة حادث تصادم تريلا نقل تقيل بميكروباص على الطريق الإقليمي بالمنوفية، وأدى إلى وفاة 19 مواطن بينهم 18 فتاة من العاملات بالزراعة، وإصابة 3 آخرين، بينما أداء الحكومة ووزرائها مكنش على مستوى الكارثة أبدًا.
- حوادث السير شيء مكرر في العالم كله وكتير منها بيكون نتيجة أخطاء بشرية، لكن في حادث المنوفية الموضوع مختلف شوية، أولًا بسبب عدد الضحايا الضخم في وجود 19 ضحية، ودا مرتبط بشكل واضح بمعدل قسوة حوادث السيارات المرتفع في مصر.
- معدل القسوة دي اللي بتقيس عدد الوفيات لكل 100 مصاب، واللي بلغ حوالي 6.9 لسنة 2024، ودا رقم كبير بيوضح إنه بالرغم من الطفرة في إنشاءات الطرق والكباري ففيه خلل في أمان الطرق نفسها وجودة إنشاءاتها بحاجة لمراجعة، وكذلك مشكلات في توافر الخدمات الطبية السريعة زي الإسعاف.
- ثانيًا لأن الحوادث دي هي نمط متكرر في كل مرة، وفي كل مرة السادة المسؤولين بما فيهم وزير النقل بيرمي باللوم على العنصر البشري، بينما في الكوارث المماثلة النقاش بيتخطى التبريرات إلى تحمل المسؤولية، وهنا ضروري نتذكر إنه وزير النقل السابق هشام عرفات اللي تولى بعده السيد كامل الوزارة استقال في حادث مشابه هو حادث قطار رمسيس في 2019 وكان عدد الضحايا وقتها 28 وفاة.
- الطريق الإقليمي نفسه اللي حصل عليه الحادث هو طريق جديد من 2017، ومن بعد افتتاحه سريعا عشان اللقطة والانجاز دايما بيحصل فيه مشاكل تقنية تؤدي لإغلاق أجزاء للإصلاح كما في حالة الحادثة الأخيرة.
- الواضح قدامنا هو استهانة الحكومة وعلى رأسهم كامل الوزير بحياة المصريين، والحقيقة دا مش استنتاج من التعامل غير المكترث مع الحادث وعدد الضحايا، ولكن سبق وقاله السيد كامل صراحة في حادث قطار الزقازيق سبتمبر 2024 اللي تسبب في وفاة 4 مواطنين وإصابة 50 شخصًا.
- وقتها الوزير حاول يقلل من حجم الكارثة، وقال إنه الحادث مش كبير ووجه اللوم للإسعاف اللي وصل بعدد 25 سيارة ما تسبب في إشعار المواطنين إنه حادث كبير وقال نصًا: "مكنش الكلام دا كله مطلوب"، وكأنه مطلوب حشر 50 مصاب في عدد سيارات إسعاف محدود علشان السيد كامل بيهتم بمسألة إحراجه قدام المواطنين ويمكن قدام آخرين.
- التصريح دا بيوضح نظرة السيد كامل الوزير لعدد 4 وفيات و50 مصابًا، فكيف يرى حوالي 5 أضعاف عدد الوفيات دا؟ هل نظرته تغيرت؟
***
كوارث عهد كامل
- خلال عهد السيد كامل الوزير الممتد لأكثر من 6 سنوات ، بل ممكن نأرخ له من وقت ما مسك الهيئة الهندسية وده للدور الكبير اللي بتلعبه الهيئة في مشروعات الطرق ، وده طبعا قبل أن يصبح وزير مزدوج للنقل والصناعة مؤخرًا، شهدت البلد عشرات الحوادث الكبرى، اللي نقدر نعددها ونعدد عدد ضحاياها بكل سهولة.
- أبرز الحوادث الكبرى دي كان حادث قطار الصعيد المكيف في طهطا محافظة سوهاج اللي اصطدم في قطار من الخلف مارس 2021 واللي اتسبب في وفاة 32 شخصًا، ومن قطار الصعيد إلى قطار قليوب في مارس 2023 اللي اتسبب في وفاة شخصين وإصابة 20، وقبلها حادث قطار فاقوس في سبتمبر 2022 واتسبب في وفاة 3 أشخاص و11 مصابا وقبله حادث قطار طوخ اللي اتسبب في وفاة 11 شخصًا وإصابة 98 آخرين،
- ومن حوادث القطارات إلى الطرق، في يونيو 2023 وقع حادث على الطريق الدائري الأوسطي واتسبب في وفاة 9 مواطنين، إلى حادث الجلالة واللي اتسبب في وفاة 12 طالبا وإصابة 40.
- الحقيقة اللي ذكرناه دا جزء من كوارث ضخمة بتحصل على طرق مصر وعلى سككها الحديدية، بدون ما نشوف أي إجراء حقيقي وجاد لإنقاذ أرواح المصريين.
***
كامل الوزير بلا حساب
- أثناء حادث المنوفية، السيد كامل الوزير كان موجود في تركيا، لحضور منتدى الترابط العالمي للطرق، لكن احتاج أول تصريح منه لتعزية أسر الضحايا أكتر من 24 ساعة كاملة مع الإعلان عن قطع زيارته لتركيا، لكن للأسف دا مقالوش كامل الوزير بنفسه ولكنه أبلغه للمذيع أحمد موسى.
- بل ومجلس الوزراء بعد 24 ساعة من الحادث بدل ما ينشر بيان اعتذار وتعزية من كامل الوزير كحد أدنى، بينشر بيان يرصد فيه تفاصيل جولة السيد كامل في تركيا!
- الغريب إنه السيد كامل الوزير قال لأحمد موسى إنه ناوي يرجع مصر من أجل تفقد الطريق الدائري الإقليمي، بالرغم من إنه كامل الوزير تفقد قبل الكارثة الطريق الدائري الإقليمي أكتر من مرة، وبالتالي السؤال: الجولة التفقدية دي هتضيف إيه جديد للطريق مضافوش قبل كدا؟
- الطريق الدائري الإقليمي افتتح في 2017 وفي 2024 تم إغلاقه بشكل جزئي علشان تتم فيه إصلاحات بتكلفة مليار جنيه لم يتم الإعلان عنها أو عن سببها خصوصًا وإنه الطريق جديد وأنفق عليه أكتر من 10 مليارات جنيه.
- السيد كامل الوزير كالعادة ألقى باللوم على العنصر البشري ضمن خططه لـ"ضبط منظومة النقل"، وقال إنه الوزارة سيتم إعادة تنظيم وتأهيل مستخدمي وسائل النقل وإعادة وتنظيم وتأهيل سائقي المركبات وخصوصًا الشاحنات.
- الحقيقة الكلام دا لا يختلف كتير عن سياسات السيد كامل الوزير قائد لواء العسكرة في الحكومة، واللي شايف إنه تأهيل الموظفين ورفع كفاءتهم بيكون من خلال منحهم دورات في "9 استعد"!
***
الإقالة والمحاسبة
- اللي بيحصل دا مع عملية إنفاق شديد الضخامة على إنشاءات الطرق والكباري وقطاع النقل بشكل عام في مصر، واللي خلا السيد كامل الوزير هو أكتر وزير راح البرلمان علشان يتوافق له على قروض، الرئيس نفسه وصف اللي بيعمله بإنه "نحل وبر الدولة".
- خلال أقل من 9 سنوات أنفقت الحكومة 2 تريليون جنيه، دا طبعًا مصدرها الاقتراض الكبير بلا أفق، وفوق منه رفع أسعار تذاكر المواصلات على المصريين بشكل متكرر وشبه دوري مع رفع أسعار البنزين.
- الإنفاق دا مش بس بيتم على مشروعات البنى التحتية من طرق وكباري وخلافه غير مدروسة ودا بيشكك بالتبعية في كفاءتها، لكنه كمان بينفق بهرجلة وعلى الهواء مباشرة.
- خلال عهد الوزير كامل، اتوجهت له انتقادات مكررة لإسرافه في الحصول على القروض، وكان رده شديد الغرابة في إحدى المرات لما قال: "لو أنا باخد الفلوس دي اجيب بيها بونبوني وشوكولاتة أحجر عليا"، لذلك وبعد الكارثة دي مضطرين نسأل السيد كامل: ولو الفلوس دي بتترمي في الأرض والمصريين بيموتوا؟
**
- الحقيقة احنا دلوقت محتاجين نسأل السيد كامل الوزير، والسيد الرئيس عبد الفتاح السيسي، ما هو مبرر بقاء وزير نقل فاشل وفشله تسبب في كل الكوارث وحصد كل الأرواح دي بل ومكفائته بوزارة إضافية؟ هل المسؤولين في الدولة التي بلا رقابة أو محاسبة بيفتقروا لأبسط درجات الحس السياسي وتحمل المسؤولية؟
- هل يا سيادة الرئيس لأن كامل الوزير ينفذ سياساتك وقناعاتك الشخصية بحاذفيره في إغراق مصر بالديون تبقيه في منصبه؟ ولا من أجل عبارات المديح والإطراء التي يتغنى بها في اللقاءات التلفزيونية؟ وهل المصالح الشخصية والسياسية فوق دماء المصريين؟
- لذلك ومن أجل إنقاذ حياة المصريين من مزيد من الفشل والإصرار عليه، مطلوب بشكل فوري إعلان كامل الوزير استقالته أو إقالته من منصبه، مع بدء إجراءات محاسبة واضحة ومعلنة ونزيهة في كل ما اقترفه من كوارث.
- والأهم هو إعادة فتح ملف الطرق والإنشاءات في مصر بشكل شامل ومراجعة كل التفاصيل الخاصة بإنشاءات الطرق وتطويرها، بما فيها العقود والمواصفات ودراسات الجدوى، ومحاسبة كل مقصر مهما كان.
**
#الموقف_المصري
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.