- إمبارح الأحد، قتل القرش سائح إيطالي على شواطئ مدينة مرسى علم جنوبي مصر على البحر الأحمر، كذلك أصيب سائح آخر بجروح خطيرة من نفس القرش.
- الخبر نشرته وكالة الأنباء الإيطالية الرسمية، اللي نقلت عن وزير البيئة المصرية ياسمين فؤاد، إنه الوزارة هتبدأ تحقيق شامل في الحادث، بينما قال بيان الوزارة إنه الهجوم حصل في مياه عميقة خارج منطقة السباحة، لكن الوكالة الإيطالية بتقول إنه السائح مكنش بيسبح ولكن كان بيغوص.
- والحقيقة دا شيء غريب جدًا، إنه البيان يحسم رواية معينة عن الحدث، وكأنه إعلان فتح تحقيق دا تحصيل حاصل زي ما بيحصل كتير في الحوادث المأساوية الي بتودي بحياة مصريين، وده دفع الوزارة إنها تعدل البيان بحذف الجملة دي تحديدا بعد 6 ساعات من صدوره.
**
تعليق اللوم على الطرف الأضعف
- بعد الحادث، عاد الجدل مرة تانية، حول أسباب مقتل السياح في هجمات القروش، وبدأ مجموعة من رجال الأعمال العاملين في مجال السياحة، وعلى رأسهم رجل الأعمال الشهير نجيب ساويرس، يهاجموا مراكب الصيد في منطقة البحر الأحمر واعتبارها هي سبب الحادث وبتهدد السياحة وغيرها من الاتهامات.
- ده رغم إن فيه قرار أصلًا صادر محافظتي البحر الأحمر وشمال سيناء بمنع الصيد الشامل في البحر الأحمر، ودا اتسبب في معاناة كبيرة للصيادين اللي ملهمش مصدر رزق آخر.
- القرار دا كان بناء على توصية صدرت في يونيو اللي فات من لجنة حكومية مشكلة لبحث المسألة، بعد حادث مقتل سائح روسي في هجوم للقرش، واللي مكنش أول هجوم سبقه في يوليو 2023 حادث مشابه بمهاجمة القرش لسيدة نمساوية ماتت متأثرة بإصابتها.
- من الطبيعي البحث عن السبب الحقيقي للظاهرة بما انها متكررة، ومحاولة علاجها، خاصة وإن سمك القرش بطبعه مش بيهاجم الإنسان دوريًا لأن القرش مش بيتقبل طعم لحم البشر أصلًا، ولأنه فيه 4 أنواع فقط هي اللي بتهاجم الإنسان منهم اتنين فقط موجودين في البحر الأحمر.
- بعد الحادث اللي فات، اتكلم خبراء عن إنه القروش نادرا ما بتهاجم البشر ودا بسبب خلطها بين رائحتهم وبين فرائس أخرى مفضلة لها، ودا بيحصل عادة بسبب سلوك خاطئ زي استخدام روائح بتجذب القروش، أو لجنوح بعض إناث القرش خلال موسم التزاوج للبحث عن مياه دافئة ودا سبب طبيعي، أو بسبب التغيرات المناخية واحترار الأرض اللي بيخلوا القرش يهاجر جماعيًا، ودا نتيجة واضحة لإهمال مواجهة مشكلة زي التغير المناخي.
**
البحث عن السبب الحقيقي
- وبالتالي بقى السؤال هنا، هل فعلًا الصيد وأرزاق الناس دي هو السبب فعلًا؟ الحقيقة لا، فيه سبب آخر أهمله الجميع خلال الحادث اللي فات، لما أحد شيوخ الصيادين أكدوا إن أحد الأسباب هو تراكم وزيادة الأسماك قرب الشواطئ بسبب قرارات حظر الصيد في الموسم وقتها، ودا جذب أسماك القرش.
- وبالتالي، السؤال هو ليه محدش بيحاول ينتبه للملاحظة دي، خصوصًا يعني مع تكرار الحادث في ظل استمرار توقف أنشطة الصيد؟
- أما السؤال الأهم، فهل اللجنة الفنية الحكومية أدت شغلها كما يجب وإزاي وصلت لنتيجة إنه السبب هو الصيد اللي حظرته ومع ذلك المشكلة قائمة؟ ولا اللجنة استسهلت مثلًا وقالت لنا أصل الصيد هو السبب وامنعوه، بينما مطلعش هو السبب ولا حاجة!
- السؤال التاني، بجانب بحث سبب الحادث، هو ليه وزارة البيئة لم تسع للبحث عن حلول أخرى للمسألة، وأولها ما سبق واقترحناه بعمل نظام لتتبع أسماك القرش في البحر الأحمر من خلال شرائح تتبع الموقع، واللي هيساهم إضافيًا في دراسة سلوك الأسماك دي وإزاي بتتصرف، وبالتالي يكون فيه كمان فرصة لتطوير البحث العلمي في المساحة دي.
**
- نتمنى إننا نهتم ببحث المشكلة دي بجدية بعيدا عن تبادل الاتهامات واللوم، ونركز أكتر على البحث عن حلول علمية سليمة، أولا لحفظ حياة الناس عموما، وثانيا لحماية نشاط من أهم الأنشطة الاقتصادية لمصر.
- خالص العزاء لأسرة السائح الإيطالي الراحل، ربنا يرحمه ويحسن إليه، وتمنياتنا بالشفاء العاجل للمصاب.
#الموقف_المصري
الرابط
